السبت، 21 مايو، 2011

من الاخر




كل الل هتقراه دلوقتى هو مبنى على مبدأ بسيط وهو ان لو الحرامى او المجرم طلبوا منه يختار القاضى الل هيحكم عليه هيختار قاضى فاسد او اهبل او قاضى هو ماسك عليه حاجة او قاضى ولائه الكامل ليه...

وبناءً على القاعدة دى.. مبارك اختار ان المجلس العسكرى هو الل يمسك البلد بعده... وكل الناس عارفين ان ولاء المجلس العسكرى لمبارك اكبر بكتيير جداً من ولائهم لمصر والمصريين... كمل قراية وهثبتلك
ولائهم الكامل لمبارك هو السبب انهم شافوا الفساد طول السنيين دى وسكتوا..

يا سادة.. طنطاوى وعنان وبقية المجلس كان تحت ايدهم الجيش المصرى بأكمله ومتحركوش.. متحركوش لما القطار اتحرق.. متحركوش لما الراجل اتقتل فى بورسعيد وهو بيحاول يدى مبارك رسالة.. متحركوش لما العبارة غرقت.. متحركوش لما أمن الدولة عذب الناس ولما الشرطة بأكملها عذبت الناس وعاملتهم زى العبيد.. متحركوش لما خالد سعيد مات.... متحركوش لما سيد بلال مات... متحركوش لما الاكل بقى مسرطن.. متحركوش لما 40% من المصريين بقوا تحت خط الفقر..  ومتحركوش لما الناس ماتوا فى 25 و 26 و27 يناير......
متحركوش غير بأمر من مبارك... وصلت؟؟؟

الادهى والمصيبة الل أكبر من كل ده هو الل حصل فى معركة الجمل...
تخيل الموقف..... فى التحرير الدبابات والمدرعات وحوالى 200 ل600 فرد عسكرى من كل الرتب تقريباً موجودين فى الميدان ومقفلين كل المداخل والمخارج وبيتفشوا كل نملة بتحاول تدخل الميدان... وفى نزلة السمان عضو مجلس شعب من الحزب الوطنى بيجمع البلطجية وبيحشدهم لمعركة الجمل.. البلطجية جايين من اقصى شارع الهرم شايليين سنج ومطاوى وسيوف وعصيان وملوتوف وراكبيين جمال (دى كفاية) ورايحيين فين يا عم؟؟؟ رايحين التحرير!!!!
نقف هنا لحظة.. فى فى الدنيا بلطجى هيروح لنقطة تفتيش برجليه وهوا شايل كل الاسلحة دى؟؟؟؟ طب كويس جاوب بقى على دى.. مين الل قال للبلطجى ان الجيش هيسيبه يدخل؟؟ اصل انا لو بلطجى وجالى واحد حزب وطنى وقالى روح التحرير هقوله لا يا عم شكراً حد يروح للجيش برجليه!!!!... انما كل الل البلطجية دول عرفوا ان الجيش هيسمحلهم بالدخول ومعنى كدة ايه؟؟ معنى كدة ان الجيش كان مظبط مع عضو الحرب الل حرض على المعركة...  مين بقى فى الجيش عنده القدرة انه يأمر عساكره بالتخاذل عن حماية المصريين؟؟ جاوب بقى انتا
شوف الثانية 39 فى الفيديو ده لو مش فاكر او مكنتش موجود

المصيبة الاكبر هو ان البلطجى دخل وفشخ الناس فى التحرير وشعب النعام العظيم نفض وتناسى مصيبة تخاذل كل افراد القوات المسلحة المتواجديين فى الميدان وافتكر بس ماجد بولس... أسد التحرير العظيم.... الله

يا سادة.. ماجد بولس ده واحد من ضمن حوالى 600 فرد عسكرى مسلح بالاسلحة الخفيفة والثقيلة وحالف قسم على انه يحمى شعب مصر(الاول) وارضها... فين بقى؟! هه

نرجع لموضوع الولاء... كنا بنقول ان المجلس العسكرى ولائه لمبارك.. طبعاً السكوت وعدم التحرك ده ليه تمن وتمن غالى كمان... مليارات واراضى وبلاوى زرقا... وعلى فكرة مسألة الولاء دى مش جديدة فى القوات المسلحة... ارجع بالتاريخ لورا شوية واسال ليه كل مرة رئيس الجمهورية بيتغير.. بيتغير المشير/ وزير الحربية ورئيس الاركان.. وطبعا شوية لوائات فى المجلس ان مكانش كله...  


شوف دى بسرعة وارجع تانى ... هنا

المشكلة دلوقتى مش فى المجلس العسكرى بس.. المشكلة فينا احنا كمان... احنا الل مبنحبش نتصدم بالواقع ولما بنشوف حاجة شاذة عن العادة بننكرها وبنقلب نعام... تخاذل الجيش فى معركة الجمل انكرناه.. ودهس الراجل بمدرعات الحرس الجمهورى انكرناه.. ودهس الست فى السويس بدبابة الجيش (بالخطأ) انكرناه... وقتل رامى فخرى وعلى ماهر واصابة 71 جريح برصاص الجيش انكرناه.. وحبس المتظاهريين فى السجون الحربية والمتحف وهتك عرضهم وتعذيبهم من الجيش انكرناه...  كل ده وغيره انكرناه وعملنا عبط... قلبنا نعام
بس احب اقولك ان دى خيانة... خيانة لدم ال840 شهيد الل خرجوا يهتفوا حرية  واتقتلوا بالرصاص الحى والمطاطى... وخيانة لل6000 مصاب الل اتصابوا عشان هتفوا عدالة اجتماعية.....
فى الحرب فى مبدأ.. متسيبش مصاب وراك وتتراجع.. يا تاخده معاك يا تموت معاه... عارف ليه؟؟ عشان المصاب ده كان ممكن يكون انت... وانت جريت ورا حزب او قناه او شغلانة او حتى حرية (مؤقتة) للتعبير عن رايك...

المصابين اتصابوا عشان السجن الحربى ميكونش فيه 10000 مدنى ومعظمهم ثوار... الشهيد اتقتل عشان حد ادنى للأجور.. عشان الفقير يلاقى ياكل مش يتهدد بالافلاس وميلاقيش الجاز ولا الانبوبة... عشان النظام يسقط مش عشان اللوائات يترقوا محافظين... عشان اعضاء الحزب الوطنى يتمنعوا بالقوة عن المشاركة فى اى نشاط سياسى مش عشان يمسكوا وزراء....
وعشان القتلة والمحرضيين على القتل يتعدموا مش يترقوا ويتنقلوا من مديرية امن للتانية وعشان الشباب يعبر عن رايه بحرية مش عشان يتفصل من الكلية لما يعبر عن رايه... واكيد الشهيد مماتش عشان مبارك يقعد فى شرم!!! 



نرجع لموضوعنا الل كل شوية نخرج منه...

ولاء طنطاوى والمجلس لمبارك.. هو السبب ان مبارك اختار المجلس.. زى الحرامى لما اختار القاضى بالظبط بس فى الحالة دى القاضى اجتمع فيه الولاء والفساد والحاجة لاخفاء اسراره...

ركز معايا وحياة ابوك... المشكلة... مش فى عدم محاكمة مبارك بس!!

مبارك اختار طنطاوى ومجلسه مش بس عشان يضمن برائته او عدم محاكمته... مبارك اختار طنطاوى لأسباب تانية كتيير الموضوع اكبر من مصر والسلطة يا جماعة الموضوع فيه اطراف تانية كتيير زى امريكا واسرائيل واكيد فى دول تانية كتير...

طنطاوى تحت ايده جيش كامل وجيش قوى كمان... فيه شرطة عسكرية وفيه مخابرات عامة وعسكرية وفيه بلاوى زرقا... امن الدولة لما فشل فى قمع الناس  كان لازم المخابرات تتدخل وتعمل لعبة الامن الوطنى الشريف العفيف... اكيد دلوقتى جه فى بالك رافت الهجان وجمعة الشوان ومسلسل الحفار واعدام ميت والمعارك الجميلة الل مصر كسبتها بفضل جهاز المخابرات العظيم وهتشتمنى وتقولى ايه دخل المخابرات ودول ناس نضيفة وملهمش دعوة بكل ده... لأ معلش اى واحد متابع عارف ان المخابرات متورطيين فى جرائم تعذيب ... وانا مبجبش حاجة من عندى خد هنا مثلاَ هتلاقى واحد بيتكلم عن استغلال امريكا المنحة العسكرية للضغط على المخابرات المصرية فى انهم يشتركوا فى التعذيب وتبادل السجناء بين مصر وامريكا.. ومذكور اكتر من حالة من التعذيب بالكهربا والاعتداء الجنسى والضرب ولما بيخلص كل المعلومات الل عنده بيعدموه... وبعدين دى مسميات لأجهزة قذرة سميها زى متسميها... انا مقتنع ان فى فى كل مكان ابن الكلب الخسيس وفى النضيف والثورة هدفها ان النضيف هو الل يحكم مش العكس...
انت ممكن متصدقش الكلام ده وانا عاذرك... بس لما نفس الكلام يتكرر بلسان مصرى او مصرية وبنفس وصف طريقة التعذيب زى هنا


  او هنا


 او هنا

 

او هنا

 او هنا



 او هنا



وكلهم بيشتركوا فى حاجة واحدة وهى ان رجال جيش منهم شرطة عسكرية ومنهم لابسين ملكى قاموا بالتعذيب والاعتداء الجنسى على المسجونيين... يبقى لازم تصدق...اسمهم ايه؟ مش مهم... المهم انها حصلت ولازم نعترف ان فى فى الجيش كلاب كتييير جداً عشان الاعتراف ان فى خطأ هو اول طريق الاصلاح..


المجلس العسكرى ولاد ستين كلب ومش هيجى من وراهم غير حاكم ابن ستين كلب زيهم عشان يكمل التعتيم على كل البلاوى دى...

المجلس العسكرى مجبر من اسرائيل انه يجيب ديكتاتور جديد عشان لو جاب حاكم نضيف وشريف هيستجيب لارادة شعبه وهيقطع العلاقات مع اسرائيل وهيمنع تصدير الغاز لاسرائيل

المجلس العسكرى مجبر من امريكا انه يجيب ديكتاتور موالى لامريكا عشان المنحة تستمر وعشان مصر متقفش راس براس لأمريكا زى ايران والصين وكوريا..

المجلس العسكرى مجبر من نفسه انه يجيب ديكتاتور عشان الديكتاتور الجديد مش هيقولهم من اين لك هذا...

 

 الجيش المصرى مليان شرفاء... زى ضباط التحرير وزى ايمن سالم واحمد شومان وماجد بولس وغيرهم كتيير... بس هى العادة ان الل بيتم اختياره فى اماكن حساسة لازم يكون وسخ... ينفع تجيب واحد محترم تشغله قواد؟؟

لكن الاساس سليم ونضيف وثقتى فيه كبيرة جداً وربنا دايماً مع الحق حتى لو كان اقل او اصغر.. 
الاساس ناس زى دول... ربنا يفك اسرهم 






انا شايف الحل الوحيد هو اننا ننزل الشارع ضد المجلس العسكرى

 ونجيب مجلس رئاسى معروف نزاهة كل الل فيه يحكم البلد فى المرحلة الانتقالية... انت شايف ايه؟ 

هناك 19 تعليقًا:

  1. هو دا الكلام ، تسلم والهي

    ردحذف
  2. أنا معاك طبعا و انت لخصت الكلام اللي صوتي منبوح فيه من الصبح من يوم ما الجيش نزل الشارع و من يوم ما اتاخدت 4 فبراير و عرفت الحقيقة و محدش صدقني. الموضوع اكبر بكتير من تخيلات الناس و المصريين غلابة بس معلش. مش هيحصل اسوأ من اللي حصل. و ان شاء الله ربنا معانا.

    ردحذف
  3. الكلام منطقى وكتيرر حاسيين بية ..لكن الناس اللى ف ىالشارع بقت نعام وشكلها مصممة انها تبقا نعام ..كسرت حاجز الخوف مرة وطردت مبارك وقالت الحمد للة على كدة

    لازم التحرك يكون باجماع شعبى وتتهد صورة المجلس ويجيب اخروة مع البسطاء علشان التحرك يكون تحرك بأجماع شعبى

    ولو انى مش مقتنعة بالكلام اللى بقولوة بس تأييد الناس اللى فى الشارع مهم

    ردحذف
  4. لخصت كل المطلوب يتقال ربنا يكرمك

    ردحذف
  5. كويس جداً و كأنه التاريخ بدء فى 2011 ... بس الواقع الحاضر بدء منذ زمن ... ححاول أنا كمان أكتب مع إنى لا أجيد بقدر إجادتك

    ردحذف
  6. لما اقرا كلام زي ده بيطمئن قلبي على مصر و شبابها الصاحي الواعي يا ريت صوتكم يعلى و يسمعكم الناس اللى ف ىالشارع

    ردحذف
  7. كلام صحيح مليون في المية بستغرب جدا من الي عايزين المجلس يكمل قال ايه الرئيس الي هييجي هيلمهم :/
    تسلم ايدك

    ردحذف
  8. i read it all but it think who wrote it is over reacting and i think what happened is the military council who forced Mubarak to step down because if u do remember the Council start over the clock 24 hrs before Mubarak step down and i think the military council forced Mubarek to step down yes there some staff which u can't explain but it is not that bad

    ردحذف
  9. انا كنت عارف كل حاجة بس خفت من البلاوى الى ممكن تحصل من الصدام مع الجيش لكن لما شفت التعريص بتاعهم قررت انزل يوم 27

    ردحذف
  10. متفقين كلنا على المهازل التى قام بها المجلس العسكرى وان ولاءه لمبارك ولكن لازم نفكر فى اللى نقدر نعمله ... لو قلنا مجلس مدنى محدش هينزل وهتبقى مسخر والمليونيه هتبوظ لكن باقى المطالب كلنا متفقين عليهم

    ردحذف
  11. الكلام ده حلو .. بس ممكن تقولولي مين هيختار المجلس الرئاسي..يعني هيجيبو مجلس من غير اختيار الشعب .مش منتخب يعني..الشعب مش هيقبل بكده..طب والحل ايه.
    رايي المتواضع البسيط..الانتخابات تبئا بدري البرلمانية يعني اول سبعة وهيبئا عندنا برلمان منتخب..والبرلمان ده هو الللي ينتخبلنا مجلس رئاسي يحكمنا ونقول لمجلس العسكر مع السلامة
    لكن مجلس رئاسي ممن غير اختيار الشعب محدش هيوافق عليه..وللاسف هيظهر الثوار خونة وضد الجيش..وللاسف الناس اليومين دول بتعبد الجيش :S

    ردحذف
  12. طب هو بالنسبة للضابط اللى فى الفيديو ده اللى بيقول انه صدر امر باعتقالهم واتهامهم بالخيانة العظمى وبالتالى اعدامهم وبالنسبة لضباط الجيش اللى اعتقلوا فعلا ايام الثورة ومحدش سمع عنهم حاجة وبالنسبة للثوار اللى فى السجون الحربية .. الناس دى كلها نساعدهم ازاى ونطلع المسجون منهم ازاى لو نزلنا يوم 27 مايو

    ردحذف
  13. انا مع الانتخابات المبكرة ولو الشعب اختار الاخوان حاحترم رايه لان ده الطريق الوحيد لانقاذ الثورة مما يحدث الان من تامرواضح... لازم نحترم راى الشعب فىالاستفتاء ولكن لازم انتخابات مبكرة هو ده الحل السليم

    ردحذف
  14. احنا كلنا متفقين ان المجلس العسكرى لازم يسلم السلطة لمدنيين بس الناس بتسأل ايه البديل؟؟ انا شايف ان مطلب المجلس الرئاسى صعب تحقيقه الأن لأنه مطلب مالوش شعبية و صعب تنفيذه يعنى هيتكون من كام واحد؟؟ و هيتم اختياره ازاى؟؟ و طبعا المجلس العسكرى هيستغل كل ده فى انه يقول ان ما فيش بديل ليا الا الفوضى
    طاب انا شايف ان فى بديل تانى: اننا كلنا نتجمع حوالين شخص واحد فليكن عصام شرف مثلا (و نستفيد من شعبيته مهما كانت تحفظاتنا على شخصه)أو شخص تانى غيره و نخليه يكون حكومة جديدة و نظيفة يسلملها المجلس كافة سلطاتة و صلاحياته
    و بكده المجلس العسكرى يترك السلطة و مايبقاش فى اى فوضى

    ردحذف
  15. إنت لو عاوز الحق و بتتحرى الدقــة في كلامك لازم تفصل بين قيادة الجيش و الجيش نفسه
    إذا كان موقف الجيش مرتبك في الثورة ده لإن في جزء متواطئ أنا معاك .. لكن علشان الجزء ده كان عارف إنه لو إدّى أوامر بالضرب حيفضح نفسه ، و مفيش حد من المجندين حيستجيب للأمر .. على الأقل مكانش يقدر يخاطر بكشف نفسه بقرار مصيري زي ده
    إنت فاهم كويس .. الجيش المصري حاجة تانيــة و أنا إن كنت أتفق معاك في حاجة فإن فيه فئة فعلاً لوثها الفساد
    جيش مصر يعني الأفراد اللي زي أحمد شومان و غيرهم كتير و صف المجندين كلهم .. أهالينا يعني .. اللي عمرهم ما يقبلوا يضربوا رصاصة واحدة علينا
    جهاز أمن الدولة كان ضالع في الفساد و منهم مجرمين فعلاً و يقدروا يتنكروا في زي عسكري و يعملوا فتنة بيننا و بين الجيش وللا إنت شايف إيه ؟؟
    ربنا يحفظ مصر و شعب مصر و جيش مصر

    ردحذف
  16. للأسف محدش فاهم حاجه أولا الجيش في موقعة الجمل كان يحمي الأمن العام أما من كان حقا يحرس الثوار هم الثوار أنفسهم وبالتالي هم لم يسمحوا بدخول البغال بل هم كانوا في موقف المتفرج لا يتدخلون في شئ وهكذا لباقي الثوره حتي أجبروه علي التخلي ثم يوم الثامن من إبريل لا أحد فهم شيئا وبالتالي كيف يتحرك شعب وراء شبحا مبهما ثم المهم الآن هو مقاومة مركزية القرار ومحاربة الفساد بصفه عامه وإحترام مفهوم الحريه.

    ردحذف
  17. كل كلامك مضبوط - وعلشان نعالج ده لازم يبقى فيه جراح شاطر علشان يستأصل هذا الورم السرطانى من عقل ووجدان الشعب بدون ان تتسبب هذه الجراحه فى عاهه مستديمه للمريض
    لو حصل صدام بين الشعب والمجلس العسكرى هيكون من نتائجه اعلان الاحكام العرفيه وحظر تجول (بس المره دى بجد)وهتبقى حمامات دم - مش كل الجيش هيطيع الاوامر بضرب النار على الشعب- فيحصل ان الجيش يقتل بعضه وتبقى حرب اهليه واحنا الخسرانين لان الجيش ممكن ان لاتقوم له قائمه الا بعد مده طويله
    اناعن نفسى حمدت الله على انها ثوره بيضاء ولكن اتضح من حقيقه الاحداث انها كانت لابد ان تكون ثوره ورديه وليست ثوره حمراء -ومع ان الثوره بيضاء الا ان هناك 840 شهيد رحمهم الله واسكنهم فسيح جناته - فكان المفروض نكمل حتى نسقط ونستأصل كل جسم النظام الفاسد فى حينها على الحامى وقبل ان تبرد الثوره ولكل ثوره ضحايا - لوكنا احضرنا رؤوس النظام وتم اعدامهم بعد محاكمه شعبيه لكنا حققنا جزء صغير من العداله دم بدم والجروح قصاص
    اما وقد وصلنا الى هذا المستوى من الميوعه والتراخى فلا سبيل غير الضغط على المجلس العسكرى بمظاهرات مليونيه واعتصامات حتى يستجيب تحت الضغط ولكن الحذر كل الحذر من الاعداد القليله فى التظاهرات او الاعتصامات فسوف تكون فريسه سهله للقوات التى تأتمر بأمر المجلس وقوات الامن والشرطه العسكريه وغير وغيره
    ولابد ان تجتمع الجموع على مطلب او اثنين على الاكثر والافضل مطلب واحد فقط حتى تحقيقه ثم مليونيه اخرى لمطلب ثانى وهاكذا- لو كثرت المطالب سوف يجدون الثغره التى يمرون من خلالها لتفتيت الاجماع الشعبى وضرب وحده صف المتظاهرين
    يراعى فى المطالب ان لا تكون فئويه بل مطالب شعبيه ذكيه تساعد على التخلص من رموز النظام ورموز الحزب الوطنى الذين مايزالون طلقاء ولهم انشطه فى بث الفتن والاشاعات المغرضه التى تساعد حكم العسكر على الاستمرار- مثل اشراف القضاء على الشرطه وجهاز الامن العام الجديد- او المطالبه بالغاء المحاكمات العسكريه للمتظاهرين المدنين - او المطالبه باشراف المجلس على انتخاب الشعب لرئيس مدنى لفتره واحده لا تجدد استعداداً لتسليم السلطه الى حكومه مدنيه وعودتهم الى ثكناتهم وشكراً لما بذلوه من مجهودات

    ردحذف
  18. الفتنة نائمة لعن الله من أيقظها كل واحد عاقل وبيفكر عارف ان الثورة نجحت ومبارك اتنحى لأن الجيش كان معانا واللي مش مصدق يشوف البلاد اللي حصلت فيها ثورات والجيش خد صف رئيسهاليبيا اليمن سوريا اصحو وما تخلوش حد يضحك عليكو ويوصلنا لكارثة هتاخد في طريقها الخضر واليابس لعن الله من تسبب في الفتنة

    ردحذف
  19. Dear fellow activists

    We work with a nonprofit, Muslims for Peace, Justice, and Progress, that is collaborating with a diverse coalition of organizations on an international 'Freedom March' for liberation from oppression in the Middle East and North African countries.

    We will be holding a rally on July 1 in a number of key locations throughout the Middle East (i.e. Tahrir Square as well as locations in Tunisia, Syria, etc.), simultaneous with rallies in Washington DC and London on July 2. I have copied a letter below from our executive director regarding the vision and mission statement of this internationally coordinated rally. Importantly, this can be used to foster greater ties of solidarity between social justice activists in Western countries and the brave activists overseas right now, possibly leading to a stronger push for improved foreign policy in the Western countries.

    We were wondering if you could connect us with some more Internet activists that can help us to build the Internet presence overseas for this rally. We have been working with members of the Coalition of Youth Revolution, 6 April Movement, etc. in Egypt and they are estimating a crowd of 50,000 in Tahrir Square on July 1. We would like to increase these numbers fast in order to build momentum.

    الخطاب التالي من أصدقاء بأمريكا من مؤسسة الإسلام للسلام و العدالة و التقدم يرغبون في دعم الثورة المصرية و يعلنون رفضهم للكثير من السياسات الأمريكية، و ذلك منذ بداية الثورة و فيما يلي ترجمة نص الخطاب الذي وصلني بعد الدعوة للثورة الثانية:

    سلام للجميع
    إن شاء الله إذا إستطعنا تنظيم مسيرة الحرية في 20 مدينة حول العالم سيكون ذلك أفضل ثورة ثانية ممكنة.
    بإستطاعتكم أن تظهروا قوتكم للمجلس الأعلى للقوات المسلحة بأن العالم كله يساند ثورتكم الثانية
    نحن كذلك في الغرب يمكن أن نؤثر على الجيش.
    ذلك الضغط من الجانبين يمكن إن شاء الله أن يفتح البوابة للقرارت الصحيحة. إن أمريكا لها تأثير كبير على الجيش -أمريكا تدعم الجيش ماديا- نحن -الشعب الأمريكي- نريد ذلك التوحد لنضغط على أوباما كي يضغط على الجيش ليستمر في مسار الديمقراطية و التقدم.
    نرجوكم أن تشاركونا مسيرة الحرية -مسيرة سلمية-بهدف الحرية
    نشكركم
    تعليق - في كثير من الخطابات التي وردتني يؤكد أصدقائي أنهم يريدون أن يكون للمسلمون صوت مسموع في أمريكا و أنهم لا يوافقون على الكثير من السياسات الأمريكية و أن أمريكا تدعم الجيش المصري ماديا بمبالغ كبيرة و أنهم يريدون مساندة العرب و المسلمون بمسيرة سلمية للحرية يوم 1 يوليو الجمعة في مصر و 2 يوليو السبت -لأن ذلك إجازتهم الأسبوعية- في واشنطن العاصمة و كذلك العديد من المدن في أمريكا و كندا بالإضافة للدول العربية كتونس و المنامة....
    أرجو كتابة أرائكم حول المشاركة و فيما يلي رابط الحدث:


    http://www.facebook.com/event.php?eid=121105904630990

    Creating an international network of activists can be extremely powerful in influencing change within a nation. What better way to show the world the solidarity we have in this cause than a network of huge demonstrations conducted from major cities around the world, with the same messages, placards, posters, and slogans with the common theme of a freedom march? This can be arranged in a relatively short period of time with some help from grassroots activists, if the leaders of the uprising movements seriously take part and work with activists from multiple different countries.

    This does not interfere in the internal matters of a country: it only shows the power of solidarity beyond borders.

    Please contact us at the email address mpjp@mpjp.org regarding how you can help with this important effort.

    Muslims for Peace Justice and Progress
    www.mpjp.org
    mpjp@mpjp.org

    ---

    ردحذف